【球迷會請入】利迷：開始上力！

【Now Sports】利物浦明日大戰曼城，香港利物浦官方球迷會會長Mino，認為紅軍開始上力，又相信曼城球員不會受違規案影響，利物浦不會因事件變得有利。

問：經過5輪比賽，球隊整體表現，同你哋季前預測有冇唔同？
Mino：同我哋嘅預期差唔多，經過頭兩場對紐卡素同埋諾定咸森林之後，我哋都覺得球隊依家係開始上力，咁當然球隊係有隱憂，例如兩閘卡卡斯同埋菲林龐都俾人重點攻擊，
同埋穫斯好似暫時仲未搵番信心、狀態同位置。不過比預期中好係積基，個中堅位其實都幾穩陣，而朗奴阿拿奧荷客串右閘亦有驚喜，當然佢進攻方面係能力所限，但係佢用經驗同埋路數搭救，喺防守度絕對可以阻塞漏洞。阿里遜近幾場都有高水準表現，而加保繼續都有好狀態，又助攻又自己入波。伊薩打番個正箭頭好似又開始搵番少少入波嘅感覺。其實成隊波畀我哋嘅感覺，係上緊力，係好嘅方向。當然，仲係有唔少地方需要再執，但係都同我哋預期所諗嘅差唔多。依家球員慢慢適應到伊拉奧拿嘅壓迫性足球。所以我覺得都係喺我哋嘅預期之內。

問：請評論一下巴高拿加盟至今嘅表現。
Mino：至於巴高拿嘅表演，當然佢冇參與過球隊嘅Preseason，就算佢喺世界盃後返去PSG都係一場比賽都冇正式上陣，情況就好似上年嘅伊薩一樣，表現同狀態絕對受到影響。但係睇喺兩翼嘅速度，同埋侵略性都係好強。我相信真係要畀多少少時間同埋耐性佢，去catch up番英超個節奏。唔係話想刻意貶低法甲，但始終英超閘位同埋防守球員身體嘅對抗性同埋強度，我絕對相信比法甲為高。都真係要畀多啲時間佢適應英超，球會用成億幾歐元去買佢番嚟，我明白大家都想即刻有化學作用，而其實有幾場比賽，你都會睇巴高拿嘅質素，就一定係有，但正如我頭先所講，冇preseason，而世界盃後亦都冇比賽，咁狀態就一定係唔理想㗎啦，希望佢畀多少少時間，同隊友建立默契。

問：開季到依家，哪位球員表現最討好？
Mino：相信大部份球迷都覺得係加保，當然我頭先提到嘅積基，同埋朗奴阿拿奧荷亦係surprise，但加保直頭去咗另一個level，因為你見佢上幾季淨係會喺左邊cup個大位，跟住就射近柱，勁射，但今年好似做咗以前沙拿嘅角色，除咗喺邊路產生威脅之外，間唔中有啲腳面腳背傳球，都好有威脅，伊薩都受惠佢好多助攻。

問：曼城正受違規問題困擾，會否對你哋有利？
Mino：呢個係我personal意見，我相信應該會持續一段時間，因為曼城都唔會坐以待斃，應該都請咗好多律師團隊去幫佢Defence。所以我覺得來來回回，應該都唔會係短期內發生嘅事。呢個真係我個人感受，我睇法同摩連奴一樣，即係笑吓就算囉，真係唔知單案要判幾多年。當然大家都可能會得得好嚴重嘅問題，但係我覺得牽涉到英超賽會咁多錢銀，同埋推廣，咁我深信唔會一時三刻有任何粗略決定。至於你話會罰分罰錢定係點，我自己放長雙眼去睇吓，英超賽會會唔會揸正嚟做，抑或其實可能只係罰款同埋扣分就算。
我覺得對我哋唔會有利，因為睇得出曼城球員喺依單所謂嘅不利消息，陣中仍有好多領袖級球員，而馬利斯卡係經驗豐富嘅領隊。以曼城球員身經百戰嘅經驗，一定唔會受呢啲場外消息影響。

問：請預測今場戰況及比數
Mino：今場波，好果我哋最後真係冇咗加保同伊薩，相信會係一場苦戰。雖然曼城都處於新舊交替，但新加盟嘅艾利亞治安達臣、保迪、安素費蘭迪斯，仲有本來已在陣嘅杜古、施曼尤，佢哋對球隊都有正面幫助。我哋唯有打主場，打士氣波，同埋喺球迷吶喊助威下盡量憑鬥志同對方周旋。預計今場未必一定咁好睇，想要同佢哋打成均勢，希望先穩住後防，然後睇有冇機會打突擊或者得到罰球，好似上季蘇保斯拿爾咁樣。
我預測，希望我哋可以主場贏波，贏2:1。

問：明晚有睇波活動嗎？球迷會短期內有何動向？
Mino：我哋會喺旺角睇，請到Vian（連家穎），一個新晉嘅利物浦球迷，同我哋一齊睇比賽。希望大家知道形勢未必太有利，但都畀心機幫球隊吶喊助威。

【冠軍球迷會】

今輪焦點場次1 皇家馬德里VS維拉利爾
今輪焦點場次2 利物浦VS曼城

香港利物浦官方球迷會
選擇1：皇馬勝2:1
簡述：皇馬質高取勝。
選擇2：利物浦勝2:1
簡述：點都要撐利物浦贏波。

皇家馬德里香港官方球迷會
選擇1：皇馬勝3:1
簡述：國際賽後，大家都想一展拳腳，所以會多入球 ，但入球通常會伴隨失球。
選擇2：和1:1
簡述：曼城已成待罪之身，將士必用命，預計係一場有爭議性判決嘅和局混戰。

巴塞香港官方球迷會
選擇1：皇馬勝3:1
簡述：無關是否宿敵，中肯判斷實力。
選擇2：和1:1
簡述：受壞消息困擾，狀態或受影響。

香港車路士官方球迷會
選擇1：和1:1
簡述：黃潛狀態提升，作客有力搶分
選擇2：曼城勝2:0
簡述：曼城勢銳，利物浦欠穩。

香港AC米蘭球迷會
選擇1：皇馬勝3:0
簡述：黃潛難敵銀河艦隊主場重炮。
選擇2：曼城勝3:1
簡述：115都唔驚，洗驚你利記咩！

Hong Kong Lions Club
選擇1：皇馬勝2:0
簡述：主場應該可以輕鬆擊敗維拉利爾。
選擇2：曼城勝1:0
簡述：賀蘭一球小勝利物浦。

拜仁慕尼黑香港官方球迷會
選擇1：皇馬勝2:1
簡述：皇馬主場實力雄厚，交手佔優。
選擇2：和2:2
簡述：兩軍人腳均勢，客場作戰各擅勝場。

香港曼聯官方球迷會
選擇1：皇馬勝2:1
簡述：較少留意西甲，看好皇馬主場小勝。
選擇2：利物浦勝2:1
簡述：曼城連勝勢頭料在晏菲路告終。

曼城香港官方球迷會
選擇1：皇馬勝3:1
簡述：主場攻力強。
選擇2：曼城勝1:0
簡述：好運入了一球死守。

國際米蘭香港球迷會
選擇1：皇馬勝3:2
簡述：安巴比養精蓄銳但欠後防大將，將會大手交易。
選擇2：和1:1
簡述：兩支不敗之師繼續保持不敗之身。

多蒙特香港官方球迷會
選擇1：皇馬勝2:1
簡述：過往對賽皇馬勝仗較多。
選擇2：曼城勝3:2
簡述：曼城開季暫時全勝，贏面較大。

熱刺香港 Lilywhite HK
選擇1：皇馬勝4:1
簡述：比寧咸國際賽勇態，有望在聯賽延續。
選擇2：曼城勝2:1
簡述：曼城有力保持連勝。

阿仙奴香港官方球迷會
選擇1：皇馬勝3:1
簡述：兩隊近況不佳，皇馬主場較可信。
選擇2：和1:1
簡述：期望利物浦與曼城齊失分。

祖雲達斯香港球迷會 JOFCHK
選擇1：皇馬勝3:1
簡述：皇馬攻力夠贏兩球以上，但後防殘缺，好難零封。
選擇2：曼城勝2:1
簡述：曼城攻力明顯高一皮，利物浦防守好但進攻弱。

香港紐卡素官方球迷會
選擇1：皇馬勝2:1
簡述：比寧咸入兩球，皇家馬德里贏。
選擇2：和1:1
簡述：曼城可能因重重因素，未能發揮水準今場打和。

玩法：
估中勝負得2分 ，估中比數另得3分。
每周獲勝者，可獲「主場之利」決定下星期兩場焦點場次。
每月大結算，累計得分最多者成為「每月盟主」，鬥到最後由贏「每月盟主」次數最多的球隊，榮登「冠軍球迷會」。

曼聯補時失守遭熱刺逼和1：1

3小時前

阿迪達：從白禮頓敗仗汲取教訓

5小時前

軒達臣2+1 車路士大炒般茅5：1

6小時前

哥斯靚助攻 白禮頓踢10個擒黑貓

6小時前

阿仙奴9分鐘入兩球 主場反勝列斯聯2：1

8小時前