【一生一世盃】女球迷為迪恩尼捧蘇格蘭

【Now Sports】在香港要找蘇格蘭球迷並不容易，女球迷Wing偏偏在今屆支持這決賽周稀客，原因就是為了迪恩尼，一個她表示「人生第一個鍾意的球員」。

「由2020年開始睇阿仙奴嘅時候，我就留意到有個與別不同球員，鍾意攝衫落場，喺落雪嘅環境踢波，佢更只係會著短衫短褲。當然佢嘅外貌亦都十分討好，所以就開始繼續留意呢個球員，漸漸亦再鍾意佢多啲。」Wing道出喜歡迪恩尼（Kieran Tierney）的緣由。

她續說：「佢畀我嘅感覺係『實而不華』，係一個好熱血，同時又謙虛嘅球員。最記得佢嘅一件事，就係喺2021年阿仙奴對西布朗嘅英超比賽，自己突破入禁區射入一球。佢入波之後慶祝嗰個moment、嗰種激情、嗰份熱血，令我留下好深刻嘅印象，我更加鍾意佢！」

單憑文字都看到心心眼，Wing決意越洋追星：「2023年疫情通關後，就即刻飛去倫敦睇阿仙奴嘅英超比賽。可惜當時KT只係喺後備，仲要冇份落場，淨係睇到佢熱身。事隔3年之後，佢更加離隊，回歸些路迪。咁啱上年暑假，計劃去蘇格蘭旅行，當時都掙扎緊去唔去睇佢比賽，因為都想親眼睇佢落場，好可惜佢今次都係做後備，更加坐足90分鐘，而我只係再一次睇到佢熱身，同再一次錯過睇佢落場嘅機會。」

皇天不負有心人，乍看波折重重的追星故事，還是有一個美好結局。「最慶幸嘅係，完場時可以同佢合照，同埋攞佢簽名。我仲同佢講咗句『I flew all the way from Hong Kong for you！』，我好希望佢知道，無論佢踢成點都好，喺咁遠嘅香港，都有我呢個支持者。不過，我最想都係，希望我有生之年可以真真正正，親眼睇到佢踢波。」

世界盃將至，Wing表示想到這個大賽，隨即聯想是「平時好少睇波嘅朋友，都留意嘅世界體壇盛事」，又謂即時想起上屆日本反勝德國，好熱血！既然是KT鐵粉，當然愛屋及烏支持蘇格蘭，而且她亦熟識其他球員：「因為有睇開英超，所以都熟悉蘇格蘭球員，例如麥堅、羅拔臣及麥湯文尼。」

蘇格蘭身處難打的C組，同組包括強敵巴西及摩洛哥，談到蘇格蘭的出線機會時，她說：「始終都係相隔28年至重返世界盃，出線方面當然希望可以啦，不過先唔敢諗太遠，只希望佢哋可以踢場好波，唔使包尾就已經好好。」

對於冠軍，Wing看好法國：「上屆佢哋差少少，所以有咗上屆決賽嘅經驗，今屆一定捲土重來，加上佢哋陣容都強大，暫時都係大熱。不過足球世界，咩都有可能發生，話唔定有驚喜出現呢！」

本身也是阿仙奴球迷的Wing，表示特別留意英格蘭的薩卡及迪勤懷斯：「另外，挪威都係相隔咗好耐先再踢世界盃，所以都有啲期待奧迪哥特同賀蘭喺賽事嘅合作。」

這個乖乖女最想與屋企人一齊觀看今屆賽事：「因為依家已經好少機會，可以一齊坐低睇電視。平時睇阿仙奴，都係我自己一個喺房，而世界盃就係一個好好嘅契機，等我哋可以坐埋一齊，喺電視機前面欣賞呢個四年一度嘅盛事！」

【一生一世盃】，睇波美好回憶，可以係一生一世。決賽周前訪問不同界別球迷，分享睇世盃的難忘回憶，以及對今屆賽事的睇法。

相關文章：
【一生一世盃】施寶盛：狂牛傳接仍屬世界級
https://sports.now.com/home/wc2026/news/details?id=39623502031
【一生一世盃】狂迷上屆現場追睇法國
https://sports.now.com/home/news/details?id=39621563987
【一生一世盃】余德丞撐簡尼
https://sports.now.com/home/wc2026/news/details?id=39621021858
【一生一世盃】嫁著馬騮隨山走
https://sports.now.com/home/wc2026/details?id=39616300974
【一生一世盃】劉舜文：最想同路維睇波
https://sports.now.com/home/wc2026/details?id=39613823882
【一生一世盃】居港西班牙人：決賽周兩邊飛
https://sports.now.com/home/news/details?id=39606745542
【一生一世盃】馬評人CP難忘與故友
https://sports.now.com/home/news/details?id=39601023934
【一生一世盃】植詠珊：最想約螢花隊友睇波
https://sports.now.com/home/news/details?id=39597496200

荷蘭世盃名單落實 利記菲林龐冇份

2小時前

【世盃‧G組列強】新西蘭為存在感而戰

3小時前

阿迪達：奪英超增搶歐聯信心

3小時前

【世盃‧G組列強】伊朗達利美主宰生死

4小時前

【競技企画】藍武士世盃PK戰有「輔」助

7小時前