【維拉鐵粉】帶埋夫人的信念，我往伊斯坦堡了！

【Now Sports】由季初開始，內心就一直有個諗法，如果阿士東維拉今年真係打入歐霸盃決賽，無論如何都一定要去現場親身支持球隊！
撰文：Kidd

回想季初，維拉喺英超嘅成績真係嚇死人，頭5場聯賽竟然1場都贏唔到、仲要只係藉卡殊遠射尷尬地攻入1球，當時身為球迷嘅我，心入面真係擔憂到極點。幸好，球隊藉住第1場歐霸盃比賽及時重拾狀態，慢慢搵返贏波嘅信心。自此之後，球隊好似變咗身一樣，喺季中更瘋狂錄得各項賽事9連勝的恐怖紀錄！嗰陣維拉氣勢如虹，聯賽穩守前3，我甚至覺得今年真係有機會問鼎冠軍！

可惜踏入2026年，密集的賽程令傷兵潮爆發。中場4大主力布巴卡卡馬夏、阿馬度安拿拿、麥堅及迪拿曼斯相繼受傷，球隊板櫈深度受考驗表現開始下滑。聯賽接連失分之下，排名由第3位跌落第5位，聯賽作客成績更加係慘不忍睹。幸好維拉喺歐洲賽場依然保持住高水準，強勢殺入4強！

16強及8強兩回合大炒里爾及博洛尼亞晉級4強，去到4強面對同屬英超嘅諾定咸森林，形勢變得極度吃力。首回合作客森林，維拉先輸1球 ，加上當時球隊嘅狀態同連勝中嘅森林相比，簡直係天淵之別。正當大家以為維拉又要重蹈覆轍、再次喺4強遺憾出局嘅時候，奇蹟竟然喺次回合嘅維拉公園球場發生！

靠住奧利屈堅斯、布安迪亞同隊長麥堅梅開二度，我哋竟然以4球大勝對手，順利反勝打入決賽！

仲好記得出線嗰日早上，夫人同我講：「你噚晚真係好嘈呀，自己一個人睇波都可以嗌到咁嘈！」之後平靜心情之後再問夫人：「你覺得去唔去現場睇決賽好？」夫人好爽快咁答：「想去就去啦，呢次真係有今生無來世。」

其實當時仲好猶豫不決，因為以前試過喺現場親眼見證球隊喺決賽慘敗，嗰種全場死寂、深深的失望同無力感，真係一世都難忘，我好驚歷史重演。結果夫人一句話令我徹底下定決心。佢笑住話：「乜會輸嘅咩？」無錯！只要保持信念，就一定可以！有領隊艾馬利呢個「艾馬利盃專家」坐鎮，今次絕對有機會奪冠。

各位香港維拉球迷，今日我啱啱踏上前往伊斯坦堡嘅旅程，準備前往比錫達斯球場。5月20日對弗賴堡，希望可以喺現場親眼見證球會捧起44年來首個重要歐洲錦標！

Up the Villa！

撰文：Kidd So
香港維拉球迷會主席

【兵臨天下】加比爾灑淚 恩卡比亞反譏曼城迷

51分鐘前

【英超知音人】Anne Hathaway出碟賀阿仙奴

3小時前

【兵臨天下】阿迪達調教你Gunners

4小時前

【兵臨天下】攻銳守穩 新兵對辦

5小時前

何輝：維拉「多半層」決戰弗賴堡

5小時前